Сакъердаме дувцараш

Йи1иг гучаяьлар
Кхы цхьаькха а тамашийна х1ама дар. Са наьна веший во1 Ахьмад цу хана Казахстане вахар, Акмолинске. Кхыча къамах йола саг йоалаяь вар из. Цудухьа нах Кавказе ц1аболхача хана царца вацар Ахьмад. Ши йи1иг яр цун. Царех ца1 пхийтта шу даьнна яр. Ч1оаг1а г1ийла яр из. Доккха доацача кора форточках арайоалар йи1иг ц1аг1ара. Из цунна ч1оаг1а дукха дезаш дола ловзар дар. Цкъа иштта д1аара а яьнна, юха чу ца йоаг1аш йисар. Ч1оаг1а лехар Ахьмадас ший йи1иг, нах оарцаг1баьхар. Яха-яьнна моттиг йоацаш къайлаяьлар. Х1ама ховш волча сага т1авахар из.
- Сагот ма де, дийна я хьа йо1, - аьлар цунга хьежача саго. - Кастта хьакорайоаг1аргья из. 1а фу де деза хой хьона? Ушалаш йолча д1а а вахе, эрз баккха, хьай йи1ий дег1а лакхалла цхьа эрз укхаза хьаба.
Чехка ваха эрз бера Ахьмада, хьежача саго аьннача бесса из хьахоадабир. Цул т1ехьаг1а эрз шийна хьалхашка 1о а билла, ду1а дир.
- Ер эрз чу а бихье, из йи1иг йижа иллача метте пенах харш а даьккхе, цигга ер д1ачубилла. Т1аккха пенах топпар д1ахьаха. Цох пайда баргба.
Шийга аьннар дир дас. Т1аккха ц1аг1ара ара а ваьнна, шоашта гаьна йоаццаш йолча листача хьун чу вахар из, йи1иг лаха аьнна. К1еззига ер гаьнашта д1аюкъе ваьлча, ц1аьхха цхьан берах б1арг кхийттар цун. Д1ахьежача, цун йи1иг хиннай-кх.
- Кхы а ч1оаг1аг1а г1елъенна, хьайистхила ца могаш латташ я-кх, - дувцар Ахьмада. - Сихха чу а йига, лувчаяь, хьаьста, теяь 1оюжайир аз йи1иг.
Цхьа ха яьккхар йи1иго тувлаелча санна лелаш, т1аккха хьаметтаера, къамаьл де йолаелар. Цхьабакъда, шийна хинначох х1ама дагадоаг1аш яцар. Т1аккха хьежача сага т1авахар Ахьмад. Д1айистхила ер кхоавалехьа, ц1аккха дицдала йиш йоаца х1ама хезар цунна.
- Хьо ханнахьа хьай мехка ц1аваха валаре, ер бала 1овшаргбацар 1а, - аьлар хьежача саго.
Кастта Кавказе кхаьчар Ахьмад.
Интересная статья? Поделись с другими: