Сакъердаме дувцараш

Т1ехкар
Дунен т1а тамашийна х1амаш хилац, яхаш, хезад сона. Дале а, х1анз аз дувцаргда шоана са сай вахарца нийсденна, тамашийна х1ама. Цхьан дийнахьа пхи-ялх шу хьалха веннача са лоалахочун сесаг Тами хьачуера тханцига. Со 1охайна ваг1ар, наг-наггахьа даьтта к1одара чу сискала ч1орг чу а 1отташ, шура теха чай т1а а молаш. Х1аьта Тами лаьтта 1охьежаш, сога йист ца хулаш латтар.
- Махьти, - йоах цо сога цхьа к1еззига ха яьлча, - д1аала тоам ца хете а, венна д1аваьнна ц1енда г1анахьа духьала ух сона. Х1ара бус-буса из сурт б1арга а дайя, хьасома а яьле, тхьовса ца могаш дукха ха йоаккх аз. Х1ама ховш вола саг волча йига езар 1а со.
Цох къа а хийтта, тхоай юрта вахача къайленаш йовзаш ва из, яхаш, вувцаш волча сага т1айигар аз из.
- Цхьаккха а белгалде дезаш х1ама зийнадий 1а г1анахьа мар духьала воаг1ача хана? – хаьттар х1ама ховш волча саго.
- Юкъах т1ехкарца хьерчаш, коч 1охийца хул из, - аьлар йоккхача саго.
- Т1ехкар хьерчаш хилац мар яхий 1а? – хаьттар воккхача саго.
- Хилац. Дийна волча хана т1ехкар ца хьоарчадеш кхыметтел коа д1ааравоалаш вацар из. Ше бакъ дунен чу д1авахале хьалха, ч1оаг1а дехар даьдар сога маро таьзет д1адаьнначул т1ехьаг1а из т1ехкар саг1ийна д1алелахь, аьнна. Дале а, марах диса х1ама сайна деза доландаь, сага ца луш тхоай т1оаргаца чу д1адилладар аз из. Х1анз а цига уллаш да из.
- Мара аьннар де деза 1а. Д1але т1ехкар саг1ийна, т1аккха бийсанна хийцца наб ергья 1а, - аьлар воккхача саго.
Т1ехкар саг1ийна д1аделар Таме.
Цу хана денз мар г1анахьа духьала ванзар шийна, яхаш, дийцадар Таме.
Д1аяздаьр М. Картоев
Интересная статья? Поделись с другими: